دینی مدارس — جیسا کہ اس کے الفاظ سے عیاں ہے کہ اس سے مراد وہ مراکز علم و دانش ہیں جہاں دینی تعلیم وتربیت کے جوہر سے دلوں کو بہرہ مند کیا جاتا ہے اور نور ایمانی سے لبریز و منور کرنے کا عمل مبارک انجام پاتا ہے۔ دینی مدارس کے اعزاز کا اہم اور اعظم سبب ''صفہ و اصحاب صفہ'' کے ساتھ ان کی نسبت جمیلہ ہے اور ''صفہ'' وہ پہلی اسلامی درسگاہ ہے جس کے منتظم و معلم آقائے دوجہاں، معلم انس و جان حضرت محمد مصطفی صلی اﷲ تعالیٰ علیہ وعلیٰ آلہ واصحابہ وسلم کی ذات والاصفات ہے۔ اس درسگاہ کے طلباء ''صحابیت'' کے اعلیٰ و ارفع مقام اور تاج عزت سے سرفراز ہیں۔ دنیا کی اس پہلی اسلامی یونیورسٹی کا محل وقوع ''مسجد نبوی'' علیٰ صاحبہا الصلوٰۃ والسلام کی عطر بیز فضاؤں سے معطر ہے۔

دین اسلام اور اس کی تعلیمات حریت فکر اور خودداری ایسے اوصاف جمیلہ سے سرشار ہونے کی وجہ سے ہمیشہ آزاد فضا کی متقاضی رہی ہیں اور اپنی سرشت و طبیعت کی وجہ سے دینی مراکز نے سرکاری سرپرستی کو کبھی بھی قبول نہیں کیا البتہ بعض خوش بخت مسلمان حکمرانوں نے ان اداروں کی آزادی و خودمختاری میں مداخلت کئے بغیر ان کی مدد و تعاون کو اپنے لئے اعزاز سمجھا اور اس مبنی بر اخلاص انداز میں مدارس کی سرپرستی یا معاونت کی کہ مدارس کے ذمہ داران نے بطیبِ خاطر قبول کیا۔

مدارس ہمیشہ مساجد میں قائم رہے اور عامۃ المسلمین نے حصول علمِ دین کی خاطر دور دراز کا سفر طے کرکے آنے والے طلباء کو خوش آمدید کہا اور ان کیلئے قیام و طعام کا انتظام بھی کیا۔ اساتذہ نے نہ صرف اپنے دیگر معمولات میں سے وقت نکال کر ان طلباء کو فی سبیل اﷲ علم کی دولت سے مالامال کیا بلکہ ان کی ضروریات کا بھی خاص خیال رکھا۔ زمانہ آگے بڑھتا رہا اور ماحول میں تبدیلی آتی رہی تو دینی تعلیم کے تقاضے بھی بدلتے رہے جس کے نتیجے میں یہ نظام تعلیم ''مساجد'' سے ''مدارس'' میں منتقل ہوا۔

پیر ۳ شعبان المعظم ۱۳۷۹ھ یکم فروری ۱۹۶۰ء حضرت غزالی زماں علامہ سید احمد سعید کاظمی کے زیر سرپرستی آپ کے تربیت یافتہ و دست راست حضرت مولانا غلام جہانیاں معینی رحمھما اﷲ کی سعی جمیلہ سے جامعہ معینیہ، ڈیرہ غازی خان میں مدارس اہل سنت کے مہتممین و منتظمین کا اہم اجلاس منعقد ہوا، جس میں مربوط و جامع نصاب تعلیم اور یکساں نظام تعلیم کیلئے دینی مدارس کی تنظیم کے قیام کی منظوری دی گئی۔ اس نیٹ ورک کا ''تنظیم المدارس الاسلامیہ پاکستان'' نام رکھا گیا۔

اجلاس میں مدارس اہل سنت کیلئے جامع نصاب مرتب کرنے اور اس کے نفاذ کو عملی جامہ پہنانے کیلئے ۲۵ رکنی کمیٹی تشکیل دی گئی۔ یکے بعد دیگرے کئی اجلاسوں کے بعد جامع نصاب مرتب ہوا جسے مئی ۱۹۶۰ء سے نافذ کر دیا گیا۔ غزالی زماں رازی دوراں امام اہل سنت حضرت علامہ سید احمد سعید کاظمی رحمہ اﷲ نے نہ صرف اس تنظیم کو جدید اسلوب پر قائم کیا بلکہ اس کیلئے تگ و دو میں بھی کوئی کسر اٹھا نہ رکھی۔

۱۴ ذوالحجہ ۱۳۹۳ھ / ۹ جنوری ۱۹۷۴ بروز بدھ جامعہ نظامیہ رضویہ لاہور میں اکابر علماء اہل سنت کا عظیم الشان اجتماع منعقد ہوا اور اس تنظیم کو تنظیم المدارس (اہلسنت) پاکستان کے نام سے دوبارہ فعال بنانے کا فیصلہ ہوا۔ ابتدائی طور پر تین دفاتر کی منظوری دی گئی: مرکزی دفتر لاہور، صوبائی دفتر پنجاب و سرحد و آزاد کشمیر کیلئے راولپنڈی، اور صوبائی دفتر سندھ و بلوچستان کیلئے کراچی۔

ابتدائی عرصہ تک امتحانات کو مرکز کنٹرول کرتا رہا لیکن 1981ء میں الگ شعبہ امتحانات قائم کیا گیا اور خودمختار امتحانی بورڈ کی منظوری دی گئی۔ تنظیم المدارس دو مجلسوں پر مشتمل ہے: مجلس شوریٰ اور مجلس عاملہ۔ مجلس شوریٰ کا اجلاس تین سال بعد ہوتا ہے جس میں عہدیداران کا انتخاب بھی عمل میں لایا جاتا ہے۔

تنظیم المدارس اہلسنت پاکستان نے جنوری ۱۹۷۴ء میں نشأۃ ثانیہ کے بعد اسی سال شعبان میں ملک بھر میں درجہ حدیث (درجہ عالمیہ) کا امتحان لیا اور اگلے سال ۱۹۷۵ء کے امتحان میں تحقیقی مقالہ بھی شامل کر دیا گیا۔ تنظیم المدارس نے ہمیشہ مدارس کی آزادی کو ہر صورت میں برقرار رکھنے کا فیصلہ کیا اور مدارس کی آزادی کو کبھی داؤ پر نہیں لگایا۔